E Zeedel

Wurzleblog 4

Unsere 1. Fasnacht nach der Trennung vom Stamm im Jahr 2000 Unten ist unser Zeedel von damals geschrieben von Urs Sumpf Wir exponieren uns von unserer Stammclique und machen Fasnacht in einer kleinen Gruppe mit Vorträblern, Pfeifern und Tambouren Es ist sehr empfehlenswert wieder einmal die Zeedel von früher zu lesen Viel Vergnügen

 Mer exponieren is
Wär rittled wie verruggt am Dach?
Wär macht vorusse soon e Grach?
Es pfyfft dur alli Fuege.
Isch das der Lothar wo so bloost,
dass jeede uff das Bloose loost?
Y mues emool go luege.

Nai, s isch e spezielle Wind,

er waait so waarm, er waait so lind,

als wott er is verfiere.

Er tschuppled alle zämme d Hoor

und bloost is doo derbyy ins Oor:

D Schwyz sott sich exponiere.

Der Fiidlebuurger regglamiert:

Mer hänn scho gnueg is exponiert

mit däne Sammelglaage.

Zeerscht zien aim alli duure Drägg,

denn nämme si aim s Gäld ewägg.

E Frächhait, nit zem saage!

Der aidgenessisch Meediefurz

in Sache Expo isch zwoor kurz,

der Gschmagg goot aber duure,

und alli Daag im ganze Land

heersch aine mit e bitz Verstand

vo däre Expo schnuure.

Nadierlig bilde sich die schygge

Diräggzioons- und Blaanigsclique

mit Fendt und Pipilotti.

Non eme kuurze Entreacte

hänn baidi d Keffer wiider phaggt,

wel niemer sait: Die wott y.

Wo alli meergge, ass es z dyyr isch,

was allewyyl jo nuur Bapyyr isch,

heert me der Hayek saage:

Bi z weenig Gäld und z weenig Zyt

wiird us der Expo sicher nyt.

Y wuurd die Sach verdaage.

Der Martin Heller, d Nelly Wänger,

die gseen s jetz noodynoo au änger

mit iire Arteplage.

Ooni solydi Finanzierig

hoggt schliesslig au die beschti Fierig

im Wasser. Quel Blamage!

Jetz, in der allergreeschte Noot,

wo alles maint, ass nyt mee goot,

do kunnt no ain uss Fliele.

Es isch s Staineggers iire Franz,

är wott am Expo-Dootedanz

au no im Miesli wiele.

Als Fiidlebuurger bisch nit schyych,

wie s uusekunnt, das isch der glyych,

de hesch jo nyt z verliere.

Au d Konsequänz isch nit zem Gruuse.

Ex Po haisst schliesslig Fuudi uuse.

In däm Sinn: exponiere!

Diesen Zeedel kannst Du auch auf unserer Home Page: www.wurzle.ch , neben anderen Informationen, nachlesen.